2012/11/25
‘Herrira Noa’ Lipdub-aren sustatzaileek adin guztietako jendearen partaidetza eskatu dute
Urtarrilaren 12ko mobilizazioaren dinamikari lotuta abenduaren 8an Durangon egingo den Lipdubaren antolaketan batzorde zabal bat dabil azken asteetan lanean. Horietako batzuek ekimenari babesa eman diote gaur; bertan izan da baita ere kulturgile ezagun bat: Txan Magoa. Magia truku bat egingo du Txanek Lipdubaren baitan; baina, sorpresa da, noski! Antolatzaileek Lipdubaren izaeraz eta sentsazioez hitz egin dute. Esaterako, Ziortza Jaiok azaldu du herriko hainbat elkarte eta herritarrekin bildu direla: “Era askotako jendea gonbidatu dugu parte hartzera. Hasieratik, gertutik, guztiok egon gara lanean. Ekimena herriarena dela ikustarazi nahi genuen”. Lipdubaz hausnartu du Jaiok: “Mobilizatzeko beste modu bat da, jolasaren bidez. Jolastuz eta dibertituz ere mobilizatu ahal delako”.
Peru Magdalena sortzailea Lipdubaren gidoia egiten ibili da, eta kulturgileekin harremanak izan ditu bertan parte hartzera gonbidatzeko. Bere ustez, Lipduba ekimen historikoa izango da: “Elkartasun leherketa kolosala izango da, barrearen eta negarraren ertzetan ibiliko den herri-emozio orgasmo bat”.
Rosi Aranburuk babesa agertu dio Lipdubari. Durangon gaia komentatzen dela esan du, eta entzun arte askok Lipduba zer den jakin ez duten arren, bere inguruko asko prest agertu direla parte hartzeko: “Mobilizatzeko eredu hau gozada bat da, ilusioa egiten dit”. Adierazi du adin guztietarako aproposa dela, eta helduak ere animatu ditu parte hartzera.
2012/11/24
2012/11/23
Herrirak bat egin du azaroaren 25erako deitu diren mobilizazioekin
Herrira Mugimenduaren oharra Azaroaren 25aren harira:
Emakumeenganako indarkeriaren aurkako eguna dela eta, Herrira mugimenduak bat egin nahi du Euskal Herriaren luze zabalean mugimendu feministaren eskutik antolatu diren mobilizazio eta ekimenekin.
Euskal Herriko milaka emakumek egunero pairatzen duten jazarpen eta umiliazio egoeraren aurrean gizartearen eta erakundeen inplikazioa eta jarrera ausarta beharrezkoak direla uste dugu.
Zentzu honetan, eta gure lan esparruari dagokionez, emakumezko preso politikoek espetxeetan bizi duten eskubide urraketa etengabean jarri nahi dugu arreta. Gizonezkoentzat pentsatua eta diseinatua dagoen espetxe sistema oso baten preso dira emakume hauek, emakume bezala dagozkien eskubideak erabat urratzen zaizkielarik.
Bereziki larriak diren egoerak ekarri nahi genituzke gogora, gaixotasun larriak izan arren oraindik espetxean mantentzen dituzten haiena hain zuzen. Gotzone Lopez de Luzuriagak preso jarraitzen Martuteneko espetxean, bularreko minbiziarekin, eta bere tratamendua duintasunez burutzeko oztopo handiekin. Inma Berriozabal, gaixotasun kroniko eta sendaezinak dituen arren preso dute Galizan, etxetik ehunaka kilometrotara.
Horrez gain, amatasuna galarazia aurkitzen duten ama presoen egoerak egun honetan aipamen berezia behar duela uste dugu. Frantziako kartzelatan sexualitatea garatzeko aukera erabat mugatua dago, eta horri lotuta, ama izan nahi duten presoek ezindua ikusten dute eskubide hori. Euskal Herrian ez dago amatasunerako modulurik. Espainiar Estatu osoan bakarra dago. Horrez gain, Espainiako kartzeletan haurrak hiru urte betetzean kalera atera behar du. Preso sozialek beste hainbat urtez luzatzeko aukera izaten dute haurrarekin bizitzea, kartzelatik kanpoko espazioak erabiliz horretarako. Euskal presoen kasuan berriz, ama eta haurraren arteko loturak eten bortitza izaten du, horrek dakartzan ondorio sozio afektibo eta emozionalekin, bai amarengan, bai eta haurrarengan ere.
Egoerak hauekin amaitu eta giza eskubideekiko konpromisoari lotzeko deia luzatu nahi diogu egoera hauen arduradun politikoei.
2012/11/12
Suscribirse a:
Entradas (Atom)